شعر مخصوص للريس حسني مبارك

جديد أحمد فؤاد نجم للرئيس مبارك

نؤيد سيادتك لفترة جديدة

نكمل خلالها المسيرة السعيدة

و بالمرة فيها نبيع الحديدة

مفيش حاجة تانية نبيعها خلاص

نؤيد سيادتك لأجل المزيد

من اللي تحقق بفضلك أكيد

بقينا خلاص ع الحميد المجيد

و ربك لوحده فى ايده الخلاص


نبايع سيادته ولا حد غيره

كفايا علينا نبرطع في خيره

و نوم شعب مصر العظيمة و شخيره

يقول للحرامي ما تسرق كمان

نبايع سيادته وابنه وحفيده

مفيش زي فكره قديمه و جديده

خرابك يا مالطة حيحصل بايده

ومين فيكي يعني بيسمع آذان

نبوس ايد سيادتك و رجلك كمان

تخليك معانا يا ريس عشان

وجودك ضرورة فرضها الزمان

و من غير وجودك حقيقي نضيع

دي مصر بتاعتك و احنا ضيوفك

كفايا علينا يا ريس نشوفك

و عاذرين سيادتك و فاهمين ظروفك

عليك بس تؤمر و احنا نطيع

في جزمة سيادتك كلابك يبوسوا

و فوق الغلابة بجزمهم يدوسوا

و شعبك ليلاتي يا ريس غموسه

مذلة و مهانة و حوجة و مر

لكن يعني ما دمنا شعب انتساب

و دايما وأبدا فى حالة غياب

متعملش لينا يا ريس حساب

دي عزبة سيادتك و فيها أنت حر

و دستور ما دستورشى مش فارقة خلاص

كلام فاضي كله يا فندم بناقص

كفايا علينا الفساد اللي ماصص

عروقنا و معشش و ضارب جذوره

و ايه يعني تهري جتتنا البلاوي

يوماتي كوارث، فضايح، رشاوي

كفايا علينا القعاد في القهاوي
بنستنى لما الوريث ييجي دوره

تسلم يا ريس يا جامد

تسلمي ع الرد يا سوسو

الف شكر يا ريس يا جامد

اي خدمة يا باشا بس لما اتحبس ابقى تعالى زورني بعيش وحلاوة